طلع النهار.. بقلم الشاعر معوض حلمي

طلع النهار والفجر مد ايديه

والطير بيناول للسبل غناويه

العش فاتح ضلفتين للضي

والبير ضميره حي

دور سواقي الفرح

والمروى حنى عينيه

طلع النهار والفجر مد ايديه

والحلم دار شقشق وطار حواليه

النور على خد السجر سلم

وانا لسه باتعلم

إزاي أشم الورد

واعبي إيدي بالندى واسقيه

طلع النهار والفجر مد ايديه

لليل مدار ، والضلمه بتوضيه

القلب ل ابيض في الحياه مستور

سارح وراه ع السكه سرب طيور

واهب غناه للنسـمه والنــــوار

مسحور وفارد ع الجسور خطاويه

طلع النهار والفجر مد ايديه

والجهل فارش في الحواري نبيه

وليه عبيد بأوامره بتهادن

والناس معادن

والسوق بيعرض كل شكل ولون

وعيون تنقي في الأصيل تغليه

طلع النهار والفجر مد ايديه

الكون براح والرعشه نامت فيه

فلاح بلدنا بيدبي ع اللقمه

والقله شقمه

والغدا عيش حاف

ولحاف مقطع بس بيدفيه

..............................................

بقلمي معوض حلمي الفلاح الفصيح

منشأة بطاش تمي الأمديد دقهلية